Jer 5 | NdeIBE | STEP | “Yehla ukhwele ngemigwaqo yase-Jerusalema, ukhangele emaceleni wonke, ucabange, uhlolisise wonke amagceke ayo. Uma ungathola umuntu oyedwa nje oqhuba ngobuqotho efuna iqiniso, ngizalithethelela idolobho leli.

Jeremiah 5

Kakho Olungileyo

1 “Yehla ukhwele ngemigwaqo yase-Jerusalema, ukhangele emaceleni wonke, ucabange, uhlolisise wonke amagceke ayo. Uma ungathola umuntu oyedwa nje oqhuba ngobuqotho efuna iqiniso, ngizalithethelela idolobho leli.

2 Lanxa nje besithi, ‘Ngeqiniso elinjengoba uJehova ekhona, bajinge befunga amanga.”

3 Awu Jehova, amehlo akho kawadingi qiniso na? Wabatshaya, kodwa kabezwanga buhlungu; wabahlifiza, kodwa bala ukuqondiswa. Benza ubuso babo baba lukhuni kulamatshe, bala ukuphenduka.

4 Ngacabanga ngathi, “Laba ngabayanga nje; bayizithutha, ngoba indlela kaJehova kabayazi, lemilayo kaNkulunkulu wabo.

5 Ngakho-ke ngizakuya kubakhokheli ngikhulume labo; ngeqiniso indlela kaJehova bayayazi, lemilayo kaNkulunkulu wabo.” Kodwa nganhliziyo nye labo balephula ijogwe baqamula lezibopho.

6 Ngakho isilwane esivela ehlathini sizabahlasela, lempisi evela enkangala ibadlwengule, ingwe izabacathamela eduze lamadolobho abo ukudabudabula loba ngubani ophumayo, ngoba iziphambeko zabo zinkulu, lokuhlehlela kwabo emuva kunengi.

7 Ngingalithethelela ngenxa yani na? Abantwana benu bangidelile, bafunga ngabonkulunkulu abangasibonkulunkulu, ngabanika konke abakuswelayo, kodwa bona bafeba baminyana ezindlini zamawule.

8 Bangamabhiza amaduna asuthayo, agcwele inkanuko, omunye lomunye ekhalela umfazi wenye indoda.

9 Ngingabajezisi kulokhu na?” kutsho uJehova. “Ngingaphindiseli esizweni esinjengalesi na?

10 “Ngenani lidabule phakathi kwezivini zaso lizidlwengule, kodwa lingazitshabalalisi ngokupheleleyo. Phundlani izingatsha zalo, ngoba abantu laba kabasibo bakaJehova.

11 Indlu ka-Israyeli lendlu kaJuda kazithembekanga impela kimi,” kutsho uJehova.

12 Baqambe amanga ngoJehova bathi, “Kasoze enze lutho! Akulabubi obuzasehlela; kasiyikubona impi loba indlala.

13 Abaphrofethi bangumoya nje, lelizwi kalikho kubo; ngakho abakutshoyo kakwenziwe kubo.”

14 Ngakho-ke uJehova uNkulunkulu uSomandla uthi: “Njengoba abantu sebekhulume amazwi la, ngizakwenza amazwi ami emlonyeni wakho abe ngumlilo abantu laba babe zinkuni oziqothulayo.”

15 UJehova uthi, “Wena ndlu ka-Israyeli, ngizaletha isizwe esivela khatshana ukuba sikuhlasele – isizwe esidala esiqinileyo, isizwe ulimi lwaso ongalwaziyo, lenkulumo yaso ongayizwayo.

16 Imixhaka yaso ifana lengcwaba elivulekileyo; bonke bangamabutho alamandla.

17 Bazatshwabadela amabele enu lokudla kwenu, batshwabadele amadodana enu kanye lamadodakazi enu; bazatshwabadela izimvu zenu kanye lezinkomo zenu, bazatshwabadela amavini enu kanye lemikhiwa yenu. Amadolobho avikelweyo eliwathembileyo bazawachitha ngenkemba.

18 “Ikanti langalezozinsuku,” kutsho uJehova, “angiyikuliqeda du. 19 Lapho abantu bebuza besithi, ‘Kungani uJehova uNkulunkulu wethu enze konke lokhu kithi?’ Batshele uthi, ‘Njengoba lingilahlile lakhonza onkulunkulu bezizweni elizweni lenu, ngokunjalo khathesi lizasebenzela abezizweni elizweni elingayisilo lenu.’

20 “Memezela lokhu endlini kaJakhobe njalo ukubike lakoJuda uthi:

21 Zwanini lokhu, lina zithutha zabantu abangelangqondo, abalamehlo kodwa kababoni, abalezindlebe kodwa kabezwa:

22 Akumelanga lingesabe na?” kutsho uJehova. “Kaliyikuthuthumela phambi kwami na? Ngenza itshebetshebe laba ngumngcele wolwandle umkhawulo wanini lanini olungeke luweqe. Amagagasi angavinqoza, kodwa awangeke edlule, angahlokoma, kodwa awangeke aweqe.

23 Kodwa abantu laba balezinhliziyo ezilukhuni ezihlamukayo; baphambukile, balahleka.

24 Kabatsho ezinhliziyweni zabo ukuthi, ‘Kasimesabeni uJehova uNkulunkulu wethu, onisa izulu ngesikhathi salo ekwindla lentwasa, osithembisa amaviki amiselwe ukuvuna.’

25 Ukona kwenu kukuvimbele lokhu; izono zenu zilemuka okuhle.

26 “Phakathi kwabantu bami kulabantu ababi abacathama njengabantu abathiya izinyoni, lanjengalabo abathiya imijibila yokubamba abantu.

27 Njengezitsha ezigcwele izinyoni, izindlu zabo zigcwele inkohliso; sebenothile njalo sebelamandla

28 sebezimukile njalo babancwaba. Izenzo zabo ezimbi kazilamkhawulo; izintandane kabazikhulumeli ukuba zinqobe, amalungelo abayanga kabawavikeli.

29 Akumelanga ngibajezisele lokhu na?” kutsho uJehova. “Akumelanga ngiphindisele esizweni esinjengalesi na?

30 Into eyesabekayo leyethusayo isiyenzakele kulelilizwe:

31 Abaphrofethi baphrofetha amanga, abaphristi babusa ngamandla abo, labantu bami bakuthanda kunjalo. Kodwa lizakwenzani ekucineni?